DergiZan

Yazı ve Sanat Ülkesi

Xilas / Gülnar Səma

Rəvayətə görə
Rusiyanı iki dəfə
qarlı qışın şaxtası
ölüm hökmündən xilas edib.
Birinci dəfə Napoleon
Rusiyanın ürəyinə qədər irəliləyib,
sadəcə bir qış şaxtası ucbatından
qayıdıb gedib.

İkinci xilaskarlıq
“Türkmənçay”la yekunlaşıb.
“Gülüstan”ın qisasını almaq istəyən
Türk-iran ordusu
şaxtalı qışla vuruşub.

Ya tanrı, ya da Qış
Rusiyanı qoruyub.
Taleyə bax ee
rus qışından da yarıyıb.

“Qış olub üstümə niyə gəlmisən”
ritorikan cavabsız deyil.
Məni qış yuxusuna vermə
artıq özün ayıl…

***
Ən böyük nifrətlər
başlanğıcını sevgidən götürənlərdir.
Daim axtarışda olanlar
sevgisini əbədi itirənlərdir.

Axtardığın heç nəyi tapmazsan
axtarmadığın hər şey
səni tapar.
Kəlmeyi-şəhadətini oxuyan sevgiyə
“Ya allah!”, “İnşallah!” söyləyən
nifrət hopar.

***

Sən məni hər gün
ümid-ümid öldürürsən.
Beynimə həkk olunub
yaddaşımı sildirirsən.

Mənim sənə qıymadığım
hər əzabı
sevə-sevə mənə yaşadırsan.
Daha bitdi, söyləsəm də
dönə-dönə yaşadırsan.

Mən əzab çəkmək planını
çox gənc yaşımda doldurmuşam.
Səndən başqa
mənə əzab verən hər kəsi
yolum üstdən qaldırmışam.

Sənin ümidinə qaldığımı
hər addımda üzümə vurma.
Hər gün qatili olacaqsansa,
mənə ümid vermə.

***
Səndən eşitmədiyim
xoş sözünü sevdim.
Yüz ildə bir dəfə gördüyüm
ala gözünü sevdim.

Söylədiyin bütün yalanların
ən düzünü sevdim.
Bircə onu bilirəm ki,
bu dünyada
ən özündən razını sevdim.

***
Mən də hamı kimiyəm
sənin verdiyin əzabları sevirəm.
başqasının sevgisinə qarşılıq vermədən.
Özümə problem yaradıram
problemlərinlə sənin arana girmədən.

Mən də hamı kimiyəm
səndən də fərqlənmək istəmirəm.
Səninlə mübarizə aparıb
təklənmək istəmirəm.

Sevdiyindən əzab görənlərin
başında palıd ağacı olmur ki
mən də hamı kimiyəm…

***
Sənsizliyin başını qatmaq üçün
neynədimsə, sənsiz olmadı.
Sənsizlik başımı qatmadı
başım sənsizliyə qarışdı
neynədimsə, bunsuz olmadı.

Hər şeyə son qoymaq istəyim
sonsuz da olmadı.
Özümü aldatmağa çalışmağım
onsuz da, olmadı.

Dünyada heç bir ayrılıq
vətənsiz olmasın.
Heç sənsizliyin özü də
sənsiz olmasın.

***
Ömrümdə bir dəfə
sevdiyimi dərk elədim.
Onda da səni
ölümə tərk elədim.

Sənsizliyi öldürə bilmədim
sənsiz öldüm.
Ayrılıq anlarını topladım
həsrətinə böldüm.

Sənə tərəf getdikcə
yollar ayrıcında qaldım.
Ölə-ölə sevmək mənlik deyil
mən də sevə-sevə öldüm.

Bu yazıyı paylaş:

Bir cevap yazın

E-posta hesabınız yayımlanmayacak. Gerekli alanlar * ile işaretlenmişlerdir

Bu yazarın toplam 3 eseri bulunmaktadır.

Yazarın diğer yazıları