Kəpənəyin Süqutu / Fərqanə Səfərli

Mən bütün kəpənəkləri
Dindirərdim şam üstə.
Qanadları toz tökərdi ovcuma
Qəm üstə.
Deyərdim — Ömrü nədi?!
Yığılacaq,
büküləcək bələkdə…
Deməzdim şeytan gəlib
Əl uzadar,
Dartar onu yedəklə…
Gecəyə ulduz falından
Yön verərdi
Qisməti “pərincə”lər…
Bilməzdilər
Bir gün gələr zülmət yolda
Uçub-uçub
Bir Simurqun lələyində dincələr…
Mən bütün kəpənəkləri
Yandırardım üz üstə.
Sonra peşmanlığımı
Allaha bildirərdim –
günahımın kölgəsində
Cəsədlərin toplamaqla
Diz üstə…