Yağış Yağar / Fergana Yusufqızı

Yağış yağar urəyimin küncünə,
Yağar, yağar, dərd-sərimi təmizlər.
Yağış yağar ürəyimin küncünə,
Susuz qalar təşnə torpaq, gen düzlər.

Yağış yağar gözlərimin içinə,
Gözüm dolar, boşalmağa tələsər.
Qoşularam bəxtsizlərin köçünə,
İzlər itər, arxamızca yel əsər.

Yağış yağar hisslərimin üstünə,
Hissim donar, sevdamızı isitməz.
Tənhalığım yaman durar qəsdimə,
İslanaram, yağan yağışsa kəsməz.

Yağış yağar, dayanmadan hey yağar,
Göyün yerə sevgisini bildirər.
Yağış yağar ürəyimə hey yağar,
Dərd-sərimi damla-damla öldürər