Bir Qadın Var / Gülsade İbrahimli

Darıxmışam,
hər səhər pəncərəmdən bir ümid asıram
sərçələr dənləsin.
günəşi vurmuşam şəfəqlərin yaxasına…
əllərim bahar qoxur,
həsrətim sən.
Südlü kofe dadındadır səsinlə açdığım sabahlar.
sən, sən gözəl adam,
yaraşıqlı kişi,
neçə qadının həsrət yeridir gözlərin.
əllərin həkim qədər şəfqətli,
saçlarında dəliqanlılığın şıltaq izləri.
bir qadın var gözləri yolunda qarabalıq.
bir qadın var,
baxışlarını yuyur pəncərədən yağışlar.
bir qadın var,
sən istəsən sənə xətir
bu dünyanı bağışlar.