Eşqin NƏyi Var? / Oruc Dadaşi Elman

Acı məydən dolu peymanədə eşqin nəyi var
Qartorpaq becərən danədə eşqin nəyi var

Darayır dargününü, könlünü salsın hörüyə
Sürünür zülfə tərəf, şanədə eşqin nəyi var

Sənəmi səcdəyə layiq görünən küfrü yaşat
Axı iman sarı, bütxanədə eşqin nəyi var

Sökülür can sarayı, gənci nəhanın qoruya
Belə gizlənməyə, viranədə eşqin nəyi var

Dəli aşiqlərə, məşuqə üzün gizli tutur
Demə uyduemadı, əfsanədə eşqin nəyi var

Qoparır könlünü, əqlin, ürəyindən ayırır.
Daha sərxoş, dəli – divanədə eşqin nəyi var

Ona üç günlük ömür versədə, oddan qorumur
Yaradıb yanmağa, pərvanədə eşqin nəyi var

Tanışın, aşiq edir, həsrət olur möcüzəsi
Dəmə yoldaş, qəmə biganədə, eşqin nəyi var

Baxışın yoxsulu, dilbər qapısın sürmələnir
Bəzəyi ay kimi dürdanədə, eşqin nəyi var

Günəsin nur saçının məstidir Elman qələmi
Qəzəlin yazmasa, məstanədə eşqin nəyi var