Ümid / Leyla Metin

Hər gecə arzular tut
Səhər olana kimi
Xəyallarla yaşa,yat
Ömür dolana kimi.

Nə qədər olar axı
Ümidlərdən əl üzmək
İrəliyə bir addım
Üzü arxaya getmək?!

Bu viranə qalmışın
Ən səbirlisi idim
Səbir kasam dolandan
Mənlə dolanmır itim.

Hərdən günəşdən ,aydan
Dənizdən də küsürəm.
Qucaq- qucaq arzumu
Küt bıçaqla kəsirəm.

Çətin deyildi axı
Alnıma yazı yazmaq
Şükür etməyim üçün
Məni göylərdən asmaq.

Şükür yenə min şükür
Nəfəsim gedib gəlir
Ayağım ,əlim gözüm
Hələki üstümdədir.

Başımın üstündə də
Bir balaca damım var.
İnsan tək yaşamadım
Ölməyə ümidim var.